"За што я люблю родную зямлю"

Дата: 23 сентября 2022 в 15:53, Обновлено 23 сентября 2022 в 16:02

Автор: Ковалёва К. А.

732 просмотра

У ДУА "Салтаноўская сярэдняя школа" Рэчыцкага раёна працягваецца Тыдзень беларускай мовы. Вучаніца 11 класа Тачылкіна Вераніка напісала сачыненне на тэму "За што я люблю родную зямлю".

Родная зямля.. Бацькаўшчына.. Радзіма… Беларускі народ… Родная мова… Гэтыя словы чуем амаль кожны дзень. Нехта не задумваецца над іх сэнсам, нехта прызвычаіўся чуць іх і ўсведамляць як штосьці вечнае, нязменнае. Для мяне ж гэтыя словы святыя.

Наша зямля, наша родная Беларусь не падобная ні на адну краіну ў свеце. Яна пяшчотная, як маці, сціплая, і ў той жа час зачароўвае сэрца сваёй далікатнасцю і незвычайнай цеплынёй і ласкай.

Яна добрая, гасцінная , але не дасць сябе ў крыўду, здолее адстаяць свой гонар і годнасць. Яна прыгожая і мілая, як каханая дзяўчына, якую немагчыма ні з кім параўнаць, бо ўсе іншыя ў параўнанні з ёй будуць мець блеклы выгляд.

Яна белая, бо гэты колер - сведка духоўнай чысціні, нязломнай волі, сумлення і годнасці. Яе лясы і бары, яе рэкі і азёры, яе пагоркі і шырокія гасцінцы , маляўнічыя вёсачкі і старажытныя замкі прыводзяць у захапленне кожнага замежнага падарожніка, які трапляе сюды.

Але самая вялікая каштоўнасць нашай краіны—гэта наш народ, нашыя людзі, звычайныя працаўнікі, шчырыя, сціплыя, звыклыя трываць усе нягоды і выпрабаванні, якія выпадаюць у іх на шляху. З даўніх часоў нашы людзі, “люд паспаліты” , русіны, як іх называў яшчэ наш знакаміты асветнік Францыск Скарына, паказалі сябе смелымі, мужнымі, нязломнымі ваярамі і змагарамі за сваю незалежнасць. Мы памятаем Грунвальд, Сінія Воды, Аршанскую бітву, дзе нашыя продкі з сіламі, удвая меншымі, чым у ворагаў, здабывалі перамогу. Мы памятаем нашых славутых партызанаў, толькі адзін упамін пра якіх прыводзіў у жах фашысцкіх захопнікаў. Мы памятаем усіх замучаных, скалечаных і знявечаных, чые сэрцы і жыцці былі адданыя сваёй Радзіме, свайму народу.

Ідзе час, мінаюць стагоддзі… І я веру, што мая Беларусь будзе жыць да таго часу, пакуль будзе жыць наш народ, яго мова, яго самабытная культура. Дык любіце ж свой родны непаўторны край і шануйце сваю родную мову!

Тачылкіна Вераніка

Все новости

Комментарии:

Оставлять комментарии могут только авторизованные посетители.